23-февраль Ата-мекен коргоочулар майрамы

23-февраль Ата-мекен коргоочулар майрамы

Ата журт кыйын күнгө кабылганда, айлансын ар бир уулуң чагылганга!

Эр жигиттин милдети го – мекен коргоо,

Кыйналып азап тартып, жүрөк толгоо,

Абийирин, ар намысын сактап калуу,

Жоокердин эрдиги бул – антты бузбоо.

Кыргыз Республикасынын Өкмөтүнүн 2003-жылы 20-январдагы №17- токтомуна ылайык 23-февраль Кыргызстанда жыл сайын Мекен коргоочуларынын майрамы катары салтанаттуу белгиленип келе жатат.

“Бабаларыбыздын куттуу жергебизди көздүн карегиндей сактап, тынчтыкта жана ынтымакта жашагыла” деген осуятын аткаруу – мекенин сүйгөн ар бир Кыргызстандык жаран үчүн ыйык парз болуп саналат. Ушул күнү биз – Улуу Ата мекендик согуштун, Афган жергесиндеги, Баткен коогалаңындагы согуштарда кан-жанын аябай күрөшкөн эр жүрөк ардагер-жоокерлерибизге, мекен сакчыларына өзгөчө көңүл бурулуп, аларды урмат сыйга бөлөйбүз. Согушта баатырдык менен курман болгон жоокерлерибизди эскерип, башыбызды ийип, таазим кылабыз.

Кыргызстандын эгемендүүлүгүн коргоо өзүбүздүн мекен сакчыларыбыздын колунда.1998-2000- жылдары Баткен коогалаңындагы окуялар, чек арадагы согуштук аракеттер Кыргыз мамлекети, Кыргыз армиясы үчүн чоң сыноо болду. Ата Журтубузга басып кирген бандиттик түзүлүштөрдүн мизин кайтарып, согуш учурунда чоң эрдик көрсөткөндүктөрү үчүн 401 жоокер мамлекеттик жогорку сыйлыктарды алышкан.

Тайманбас, артка кайтпас жоокерлериң,

Мекен үчүн жанын берип, коргойт элин.

Туу тутуп, ар намысын бекем сактап,

Көзүнүн карегиндей сактайт элин - деп ырда айтылгандай эли-жерин коргоого, эли-журтуна ак кызмат кылууга ант берип, аны абийирдүүлүк менен аткарып жаткан жоокерлерибиз, офицерлерибиз, Ата Мекенди коргоочулар деп билебиз.

Ата Мекендин сакчылыгында туруу, анын кол тийбестигин коргоо – бардык учурда эң ыйык, өтө ардактуу, ошону менен бирге кыйла жоопкерчиликтүү милдет болуп келген жана боло бермекчи.

Кыргыздын жигиттери, кыраандары!

Тайманбас, артка кайтпас шумкарлары!

Душманга тике туруп чеп болушкан,

Бар болгула, кыргызымдын баатырлары!

Ата журт деп, калкан болуп турасыңар!

Алоолонуп оттой болуп жанасыңар.

Көңүлдүү өткөргүлө ушул күндү!

Ата Мекенибизди көздүн карегиндей сактоо ар бирибиздин милдетибиз.

Урматтуу Ата Мекенди коргоочулар! Сиздерди 23-февраль - Ата Мекенди коргоочулардын күнү менен чын жүрөктөн куттуктайбыз! Мекенди өз өмүрүңүздөрдү тобокелге салуу менен коргоп, көрсөткөн эрдиктериңиздерге терең таазим этебиз! Бизге тынчтыкты камсыздап, ийгиликтерди жаратканыңыздар үчүн терең ыраазычылык билдиребиз!

Жергебизде ар дайым тынчтык өкүм сүрүп, гүлдөп өсө берсин! Ал эми Сиздер жеңилбес, кайраттуу мүнөзүңүздөрдөн жазбай, ден соолукта болуңуздар, жашообуздун бейпилдигин камсыз кылган мекен сакчылары !

Макаланы жүктөгөн: - Болотбек уулу Аман

Теги: #маалмат берүү,