24-март Элдик революция жана 7-апрель революциясына сценарий

24-март, Элдик революция, 7-апрель, революциясы, сценарий, иш чара, өтүү,

24-март Элдик революция жана 7-апрель революциясына сценарий

Саламатсыздарбы урматтуу бүгүнкү жолугушуу кеченин катышуучулары жана меймандар. Сиздер менен 2005-жылдагы “24-март Элдик революциянын 20 жылдыгына жана “7-апрель 2010-жылдагы Апрель революциясынын 15 жылдыгына карата Нарын облустук С.Орозбаков атындагы маалыматтык китепканасы тарабынан даярдалган “Элдин эрки-эркиндиктин негизи” аталыштагы жолугушуу кечеде жолугушуп олтурабыз. Бүгүнкү кечеге элдик революциянын баатырлары, педагогикалык колледждин студенттери,китепкана, пресса кызматкерлери катышып олтурушат.

2005-жылдын 24-марттагы революцияга ошол кездеги бийлик башчысынын уятсыз саясаты түрткү болгон.Ондогон жылдар бою бийлик экономиканы кыйратып, элдин турмушун жакырлантты.Өз көмөчүнө күл тартып, өлкөнүн улуттук байлыктарын талап-тоноого өбөлгө түзүп, өзгөчө үй-бүлө мүчөлөрүнүн байышына даңгыраган жол ачты. Ошол кездеги парламенттик шайлоодогу бийликтин адилетсиздиги жана көз боёмочулугу карапайым элдин кыжырын кайнатып, чыдамын түгөттү.Эл бийликтен үмүтүн үздү.Өлкөнүн бардык аймактарында каршылык акциялары өтүп жатты. Кыргызстан эли үй-бүлөлүк-кландык башкарууга каршы жапырт көтөрүлдү. Элибиз революция жолу менен бийликти алмаштырды. Эл жеңишке жетине албай, өлкөдөн уурулукка малынган үй-бүлөнү кууп таштаганына кубанып жатты.

Тилекке каршы адилеттикке жана калыс бийликке болгон элдин үмүтү тебеленип тепселди. Экинчи президенттин үй-бүлөсү коррупцияга мурдагыдан дагы катуу малынды. Балдары, бир туугандары мамлекеттик чоң кызматтарга дайындалып, криминал менен коюн колтук алышып кетти. Кыргызстанды талап тоноого чет элдик аферисттерди кошо аралаштырышты. Ошол кездеги Бакиевдин бийлиги баш көтөргөн депутаттарды, оппозиционерлерди, журналисттерди жана ишкерлерди өлтүрүп, бычактап, уруп-сабаганы элдин эсинде.

Эзелтеден эркиндикти туу туткан кыргыз эли мындай өзүм билемдикке, чыккынчылыкка чыдабады. 2010-жылдын жазында өлкөбүз боюнча оппозициянын нааразычылык акциялары өткөрүлдү. Бийлик буга репрессиялар менен жооп берип, адатынча коркутуп үркүтүүгө өттү. Ал эми 7-апрелде карапайым эл адилеттүүлүктү талап кылып, митингге чыкканда канкор бийлик карапайым элге карай аёосуз ок атууга буйрук берди. Ага карабай өлүмдөн жалтанбаган элибиз Апрель революциясын ишке ашырды.

“Баатыр туулса – эл ырысы, жамгыр жааса – жер ырысы” деп элибизде айтылгандай эч нерседен кайра тартпаган, тайманбас мекенчил уулдарыбыздын, элдин,жердин бүтүндүгү үчүн жамгырдай жааган октон кайра тартпай окко учушкан 87 баатырлардын эмгеги менен Бакиевдик бийлик кулатылып, акыйкаттык орноп, калыстык – өз үнүн ааламга жаңыртты. Мына ушул коогалаңда окко учкан эр азаматтарыбызга, жаракат алып кийин каза болгон жигиттерибизге арнап куран окуу аземине өтсөк.

Бүгүнкү кечени ачуу үчүн Нарын облустук С.Орозбаков атындагы маалыматтык китепканасынын усулдук уюштуруу бөлүмүнүн башчысы Сатарова Упагүлгө сөз кезегин узатсам.

Эгерде 2005-жылы 24-мартта эл козголбосо жана демократиялаштырууга багытталган саясий талаптарды көтөрүп чыгарбаса, анда 2010-жылы апрелдеги революциячыл окуя да болмок эмес. Ошондуктан, бул эки окуя тең бири-бирин толуктап турат. Мына ушул окуялар боюнча видео роликке көңүл бурсак.

Азыр анда апрель революциясынын негиздөөчүсү, Нарындагы Элдик кыймылдын мүчөсү, элдик революциянын баатыры юрист жана адвокат Эркин Асаналиевге сөз кезегин берсем. Чоң ырахмат! Тарыхты тастыктаган,элдик революциянын келип чыгыш себептери, дегеле ошол мезгилди чагылдырган “Тарыхта калган улуу эрдиктер” аттуу китеп сүрөт көргөзмө менен тааныштыруу үчүн Аманат кызы Гүлзадага сөз кезегин берсем .Чоң ырахмат! 2005-жылдагы 24-марттагы революция менен 2010-жылдагы 7-апрель революциясынын айырмачылыктарына токтолсок. Анда сөз кезегин Нарындагы түзүлгөн 21 адамдан түзүлгөн элдик кыймылдын мүчөлөрү жана элдик революциянын баатырлары сөз сиздерде. Кыргыз Республикасынын Даңк медалынын ээси, Нарын облусунун,Нарын шаарынын ардактуу атуулу Жаманова Асыл, эл баатырлары Жусубакунов Жыргал, Жумабаева Бактыгүл, Койчиева Гүлбүбүгө сиздерге сөз кезегин берсем,кыска нуска оюуңуздарды айтсаңыздар.

Сиздердин назарыңыздарда М.Баетов атындагы Нарын райондук маданият бөлүмүнүн кызматкери Санжарбек уулу Дастан “Кыргызстан” деген ырды аткарып бермекчи. Чоң ырахмат.

Бул күнү улуу тоолорду мекендеген кыргыздын кыраан бүркүтүндөй эркин учкан 87 эр азаматтарыбыз биз жашап жаткан күнүбүз үчүн өз өмүрлөрүн түбөлүккө беришти. Бир жарым миңге чукул революцияга катышкан жарандарыбыз оор жаракаттарды алышты. Бул каргашалуу окуяга элибиздин акындары кайып болуп кеткен эр азаматтарыбызга арнап ырлар, китептер, эскерүүлөр, кошоктор жазылды. Биздин эр азаматтарыбызга жалпы эле коогалаңга ,бийликти жектеген ырларга көңүл бурсак. Нарын шаарындагы педагогикалык колледждин студенттерине кезекти берсек. Чоң ырахмат!

Турмушунда тутунган өмүр жолу ар бөлөк болгон менен жашоодогу адилетсиздикке, кара өзгөйлүккө кайдыгер карай албаган жашоосунда акыйкаттыкты, чындыкты туу туткан чыныгы мекенчил жаштарыбыздын жаркын элесине арнап эстеликтер орнотулуп, гүлчамбарлар коюлуп,шейит кеткендерге куран окулуп, алардын эрдиктерин түбөлүккө калтыруу максатында китептер жазылып тарыхыбыз уланууда.

Калк үчүн күйгөн барчындар,

Качпастан тоскон денесин,

Кийинки муундар унутпай,

Эл менен жашайт элесиң. – деген ыр саптарында айтылгандай кыргыз эли баатырларын эч качан унутпайт. Калайык калктын жүрөгүндө жашай бермекчи. Анда ушул тайманбас эр азаматтарыбызга арналып чыгарылган обондуу ырларга кезек берели. Райондук маданият бөлүмүнүн кызматкери Келдибек кызы Жайнанын ыр дестесине көңүлүңүздөрдү буралы.

Чоң ырахмат. Урматтуу ушул иш чарага катышып олтурган эл баатырлары! Сиздердин эмгегиңиздерди кадырман калкыбыз баалап, жаштарыбыз түшүнүп колдоп, элдин бейпил, бакубат жашоосу үчүн төшүңүздөрдү тосуп , көптөгөн кыйынчылыктарды басып өтүп, кылган эмгегиңиздерди эч качан унутпайбыз! Ден соолугуңуздар бекем болуп, бакубат жашоо жана да үй-бүлөлүк бакытты, дайыма жандап жүргөн ийгиликти, ынтымакты каалайм. Аман болуңуздар, бар болуңуздар!

Сценарийди жазган: Жунусалиева Ж.О.

Макаланы жүктөгөн: - Болотбек уулу Аман

Теги: #сценарий,